L’assassinat d’un òme de 25 ans d’una raissa de Kalashnikov, dimècres passat, a portat Samia Ghali, consolessa de l’8n sector de Marselha e senatritz del PS, a demandar l’intervencion de l’armada dins qualques quartièrs de Marselha. Ghali o expliquèt dijòus passat en una entrevista al jornal numeric La Provence; segon ela, l’intervencion de l’armada pòt far “front als engenhs de guèrra emplegats pels rets” criminals e pels trafegants de dròga.

Cal dire que dempuèi lo començament de l’an, los reglaments de comptes se son elevats a 14 dins la vila e a 19 dins lo País Marselhés.
 
Lo ministre francés de l’Interior, Manuel Valls, respondèt lo meteis jorn, en una conferéncia de premsa, qu’èra “fòra question” que l’armada intervenguèsse dins los Quartièrs Nòrd de Marselha. “I pas cap d’enemic interior”, çò afirmèt Valls, qu’enancèt “una responsa globala, prigonda e particularament fòrta” contra la criminalitat.  “Compreni la crida al secors dels elegits d’aquela vila”, qu’“es estada daissada a l’abandonament d’una cèrta manièra”, çò apondèt lo ministre.
 
Al delà, Valls remembrèt qu’aviá decidit de classificar los Quartièrs Nòrd de Marselha entre las quinze primièras zònas de seguretat prioritàrias (ZSP), qu’intraràn en vigor aqueste mes de setembre. “L’accion conjoncha de la polícia e de la justícia (...) deu respondre justament a aquela pojada d’una nòva delinquéncia, d’una violéncia d’individús que se servisson d’armas de guèrra”, çò concluguèt lo ministre.
 
Del sieu costat, lo president François Hollande afirmèt que “l’armada a pas pas la siá plaça per contrarotlar los quartièrs” en França, quand se li demandèt son opinion a Madrid sus aquela question.

 
Un comitat interministerial lo 6 de setembre
 
Lo primièr ministre francés, Jean-Marc Ayrault, presidirà lo 6 de setembre a París (França) un comitat interministerial consagrat a l’elaboracion d’un “programa d’accion per l’aglomeracion marselhesa. Ayrault justifiquèt aquela decision en invocant lo besonh de “mostrar la determinacion del govèrn de non daissar pas las causas derivar” dins la Ciutat Focèa. Lo primièr ministre faguèt valer que “cèrts quartièrs de Marselha, dempuèi d’ans, (son estats) daissats totalament a l’abandonament”.
 
Aquel comitat interministerial, que començarà a 17h, amassarà, a l’entorn del primièr ministre, los ministres de l’Interior, de la Justícia, de l’Educacion, de la Vila, de la Reforma de l’Estat,  del Redreiçament Productiu amb lo de l’Economia e de las Finanças. I participaràn egalament los ministres del Trabalh, de l’Environament, dels Andicapats, dels Transpòrts e de l’Ensenhament Superior.
 
La sedença del govèrn Ayrault s’èra ja engatjada a trabalhar sus la situacion de Marselha “en julhet amb divèrsas reünions interministerialas”. En tot daissar sentir que la fusilhada de dimècres passat èra pas l’element entraïnaire d’aquel comitat interministerial.



_____
A prepaus dels crimes a Marselha, es de legir l’article de Matieu Castel: “Marselha, en cu profiechan lei crimis?“